الفرح

لما كل الناس بتفرح..لما كل الناس تهيص

فجأة كده مره واحده..يطب عليهم البوليس

اللي بانجو واللي حشيش..واللي اتعرض للتفتيش

اللي جوزه واللي بيره..واللي اتعرض لحيرة

اللي معاه ورق بفرة..واللي خلى الدخان عفرة

واللي معاه ياناس برشام..واللي راح السجن نام

الولا كيمو والولا بولا..عمالين يشموا كولا

اللي سرحان في الحشيشة..واللي بيشد في الشيشة

اللي عامل دماغ..واللي فيه الف بلاغ

اللي بيلفلف في سجارة..واللي دخانة ملى عمارة

اللي هربان م الجيش..واللي بيحيي بخراطيش

اللي معاه برشام صراصير..واللي بيحلي بجرجير

اللي فايق ومسطول..واللي ضاربها دماغ فول

اللي عايشها سكران..واللي م البانجو تعبان

اللي عقله ماشي مدروخ..واللي قال برشام بيدوخ

واللي قاعدين مسطولين..واللي بيرقصوا بالسكاكين

اللي بيرقص بالبلطه..واللي عينه زي الشطه

اللي بيرقص بالسيخ..واللي عامل مزه فسيخ

وتجار العجيل..رقصهم بالسواطير

اللي رقص بالطبنجه..واللي رقص على السنجه

اللي رقص بالخناجر..واللي حيا ألف تاجر

أفراح دايماً متداريه..وفي بلدنا معديه

الفرح محروس بالشرطه..حتى لو فيه بانجو وبلطه

الفرح فيه اتنين عساكر..وتلاقي فيه ألف تذاكر

الفرح فيه اللواء..ادخل اتفرج جواه

سمعني يالا ألف تحيه..الفرح عدى ميه ميه

تأليف: أحمد محيسين