الوهم

موهوم انك مريض..رايح ل100 طبيب

لكن مفيش علاج..لأنك مش مريض

موهوم انك فقير..ومعاك فلوس كتير

ما هو فيه اقل منك..مش عنده حتى سرير

موهوم بالوهم نفسه..ساجنه جواك وحابسه

عاشق احلام اليقظه..وتوب الحلم لابسه

الوهم سكن جواكوا..و في ارض الخوف رماكوا

خايفين من أي حاجه..فالوهم عاش معاكوا

صاحي من وسط كابوس..خايف ع الأرض تدوس

لأن الوهم نفسه..خلاك بقيت مهووس

موهوم إنك محسود..بتدعي ياكلها دود

كل عين بصتلك مره..و كانت عين حسود

موهوم انك مسحور..والسحر في أرض بور

موهوم ان جنك..قرب على الظهور

خدتوا م الوهم لذة..يا ناس يامستفزه

حبين الوهم نفسه..لكن واخداكوا العزه

انكوا تعترفوا بيه..تعترفوا بالحقيقه

انكوا موهومين..حتى و لو دقيقه

لكن واضح انه..لكل وهم تحنوا

الطفل عايش رجوله..والعجوز بيصغر سنه

العاطل حب العطله..موهوم بالبطالة

والعامل كاره الشغله..موهوم بالخسارة

حتى تلاقي الشعوب..موهومه بالحروب

لكل حرب اوانها..مش بتيجي مع الغروب

مرض مالوش وجود..يبقى هو الوهم ذاته

فقر من غير حدود..يبقى الوهم فقر جنابه

محسود من غير حسود..فحاسد المال اصحابه

مسحور من غير ساحر..يبقى الوهم سحر جنابه

تأليف: أحمد محيسين