أرض الأماني
هتعمل ايه لو يوم خارج..مالقتش حد في الشارع
ولا في البيوت ولا في الطرق..ولا في الكنيسة ولا الجامع
أهلك سابوك امك وابوك..ازاي تعيش نفسك تموت
سرح الخيال في أرض الأماني..نسيتهم بس عشان آذوك
دافع الطمع هنا إنتهى..كل الفلوس ملكتها
كل البيوت كل القصور..وقفت محتار عندها
هدوء شديد واقف وحيد..وصوت هناك جاي من بعيد
جريت عليه مشتاق إليه..لكن أكيد مفيش جديد
نفسك تشوف أي بشر..نفسك تسمع ولو خبر
يقولك فين راحو وسابوك..لكن مفيش أي أثر
هتفيد بإيه كل الفلوس..ومهما تشرب من كؤوس
عمرك ماتقدر تتعايش..في وضع إنت معشتهوش
شوفت الخيال راح بيك لفين..قاعد محتار وحيد حزين
كل الأماني ملكتها..لكن بتسأل راحو فين
رغم إنهم بيكرهوك..بتسأل فين راحو وسابوك
لو رجعوا ترجع كل حاجة..تعيش فقير وبيعادوك
ياخسارة أمانيك إنتهت..لما البشر منك تاهت
نسيت مكانهم في الأماني..اتهدمت بعد ما اتبنت
مفيش أماني في أرض واقع..الأماني في الخيال
حتى الخيال ناقصه أماني..عاوز دهب كسر جبال
لا تعيش غني وسط كابوس..كله بيحبك بالفلوس
لا تعيش غني وسط خيال..مفهوش بشر مفهوش نفوس
أو عيش تعايش في أرض واقع..أكسر جبال لو بالمدافع
لازم تضرب علشان تفوز..أهجم لأما تعيش مدافع
اتمنى واحلم قوم ونفذ..والفضول خليه محفز
دا اللي حلم يطلع جبل..كان ع الصخور دايماً يحسس
اوعاك تنسى مكان الناس..دا وجودهم في احلامك اساس
ازاي تطلع اول بدون..جمهور وخسرانين وكاس
تأليف: أحمد محيسين
إرسال تعليق