أسطول النفاق

كلهم كلام..وكلامهم كلو كالتراب

أعداء في ظهر بعض..في وش بعض يكونوا أصحاب

كلهم بحارة أبطال..وسط محيط الكلام

بينخوا يرخوا شبكهم..لما يشوفوا سرب الحيتان

يضطروا يعكسوا الأسطول..عكس إتجاه السرب

عارفك مش فاهم كلمة..أصل بواجه كدب بكدب

كدب أسطول المنافقين..اللي احتلوا جزيرة عقلك

يمكن فكرك حاربهم..يمكن أستضافهم جهلك

أو يمكن إنت منهم..مش لاقي غير جزيرتي

لو خطيت الشعاب..فأهلاً بيك في جيرتي

أهلاً في جيرة نحس..لحس جزامكوا منها أحسن

مش مستضيفكوا بجهلي لأ..بزيد في نحسكوا نحساً

فأنا بشتري منكوا بضاعة..ببيعها ليكوا بضعف السعر

مش حباً في التجارة..لكن ببيبع كلامكوا كفعل

عاشقين نبيذ جزيرتي..رغم أن الهيروين كلامكوا

بتبادلوا صنف بصنف..شوفتوا ازاي لنبيذي أدمنتوا؟

فنبيذي مفعوله خدركوا..يسطلكوا فتنصبوا مسرح

فتأدوا سيناريو غبائكوا..أفضل من مشهد كسرى

أفضل ما تسيبوا جزيرتي..تروحوا تحتلوا جُزر الباقي

فيزيد نفاقوا نفاقهم..بالتالي يكتر أعدائي

بالتالي لو عيشت أحاربكوا..أو حتى أصنع في نبيذكوا

مش هأقدر أكفي الباقي..تضييع حياتي بحياتكوا

فأفضلي تكونوا ع الشط..مساطيل بتفوح أسرارهم

بيحاربوا بعض ببعض..بعد ما ينصبوا مسرحهم

فأنا أزيدهم بنبيذهم..فياكلوا في بعض زيادة

لو نمت وفاتني المشهد..أعمل للحلقة إعادة

لو فاقوا هيلاقوا..أسطولهم زاد في نداءه

فيهدوا المسرح يمشوا..أخسر تمثيله وغناءه

تأليف: أحمد محيسين