مجنون
اتهمت نفسي بالجنون
علشان أقول أنكوا عاقلين
ما انا لو عاقل هاعيش وحيد
في وسط عالم م المجانين
بصلي وادعي ربي وابكي
فقالوا "ادعوا للملعون"
وغيري قالوا عليه المهدي
كدب، سرق، كمان مديون
فيدعوا عليا ويدعوا ليه
فاقول لأعصابي بس أهدي
دعائهم يعني يفيد بإيه
دا إمامهم نفسه كان بيهزي
علمت معلمهم بعلمي
وعلمه ما استفدتش بيه
نكر انه اتعلمها مني
وساب تجهيلي لمنافقيه
نصحت خطيبهم لما أخطأ
قالهم يبعدوا عني
فقالوا "أزاي تنصح معصوم؟"
وقارنه دقنه جنب دقني
قولتلهم بإيه سبقني؟
قالوا "أسكت اوعى تنطق
دقنه يا فاشل أطول منك
أنت منافق هو أصدق"
قعدت لوحدي في المحراب
فقالوا "قاعد مستني جِنك!!"
أدناهم قرأ آيات
في ودني وقالي "خدني جنبك"
واضح أن جِني جَنُه..جنته بقت تراب
كان كبير وأصغر من سِنٌه
جن أزاي وانا في المحراب!!
فقبل مايتهموني هما
كنت خارج من عالمهم
انسحبت وخدت عقلي
اتفقنا نسيب مكانهم
قولت هاأدعي الجنون
لو واحد فيهم سألني
كم من مدعي الجنون؟
كام واحد قبلي سبقني؟
سابوني في حالي لأه طبعاً
جريوا ورايا بالصحون
العادي يكسروا قله
بس أتغير المنظور
بعد خروجي مش سابوني
كله نازل فيا طعناً
قالوا لأولادهم "كان ماسوني"
كله نازل فيا لعناً
لما رجعت وشافوا مالي
توب الأيمان لبسوني
كل منافق منهم جالي
قولتلهم أبعدوا وانسوني
وزنت عقلي جنب عقولهم
قولت لأ مش هارجع تاني
رحلت بعقلي مشيت بدونهم
كنت بسيب دليل كلامي
إرسال تعليق