الواسطة

بالواسطة تعمل اي حاجه..في البلاد دي

بالواسطة ذوق أو عافية..كـلـه هيـعـدي

بالواسطة تبقى باشا..لـو حـتـى مـصـدي

بالواسطة تطلع تدخل..تنزل تطلع مهدي

بالواسطة بقيت دكتور..بالواسطة بقيت مـهندس

بالواسطة مالكش الجيش.. مَمعكش ادخل والبس

بالواسطة بقيت في الشرطة..بيها خرج وأحـبس

بالواسطة افتحلك شركة..مَمعكش أقفل وتـربـس

بـــالواسطة أدخل الجامعة..بالواسطة أتعيـن فـيـهـا

بالواسطة إركنلي يا اسطى..وتجيب عاليها واطيها

بـــالواسطة بقيت فلاح..إزاي مـعرفـش انـا فـيـهـا

بــــالواسطة بقيت مرتاح..حــامــيـهـا حـرامـيـهــا

بــــالواسطة سيب البلطة..وامـسـك مـدفــع رشـاش

بالواسطة اضرب الناس..بالواسطة اضربها طناش

بــــــالواسطة تبقى البيه..والـبـيـه هـو الــحــشــاش

بــــــالواسطة سيب الكارو..عـنــدك شـركـة أوناش

مالواسطة شبابنا ضاع..مالواسطة هاجروا طفشوا

مالواسطة الكل الكل جاع..في الـبحر كمان أتقفشوا

مالواسطة بقوا ديابة..في الأرض حـفـروا ونـبـشوا

مالواسطة أشتغلوا وتـعبوا..مالشغل كمان أتـألـشـوا

مالواسطة كون نفسه..مالواسطة فتح كباريه

مالواسطة ظبط نفسه..مسـتـغـرب مـني لـيـه؟

مالواسطة بكرا تضيع..ترفعها تبص عــلــيه

مالواسطة تبقى حاجه..من غيرها تبقى جـنيه

مالواسطة عشنا العار..مــالواســطة أنتشر الدم

مـــالواسطة بقينا دمار..مــن غــيـــر أولاد العم

مـــالواسطة تخون الجار..وتــأكـــلـــه الـــســـم

مالواسطة بقت الواسطة..مالواسطة الواحد أتغم

تأليف: أحمد محيسين