رعب الثانوية

الحركة مش عادية..في امتحانات ثانوية

في حظر تجوال..ليك انت وهى

وطلوعك من البيت..لمراجعة نهائية

وكلامك بالتنقيط..تقفل زي الحنفية

آخرة مشوارك ايه؟..الدرجة النهائية؟

اوعاك تقل عن..ميه وواحد في الميه

جابوا لنفسك إحباط..ودماغك بقى خلاط

تخلط ماده على ماده..لحد ما عقلك شاط

خروجك مع اصحابك..استراحه بين اشواط

تتفسح وتروح فين..اوضتك زي الفسطاط

دول شالوا لبس خروجك..شبشب جزمة برباط

اخوك واقف على بابك..وكإنه من الظباط

عشاك مش دسم..تآكله كإنه سم

قال ايه عشان تركز..دول يحرقوا الدم

حذفوا كل القنوات..ناشونال والأف إم

وخبوا التلفزيون..وعيشوك في هم

إن فكرت تتكلم..يقولولك إكتم

نفسك تغير جو..أفصل حاسة الشم

دمرولك اعصابك..منعوك من اصحابك

جاتلك حالة نفسية..دا آخرة اللي نابك

وجالك الدكتور..حاسس بأيه جنابك

صداع مع دوخه..وضربات في اجنابك

خاد والدك على جنب..وقاله ع.اللي صابك

أبوك شتم الدكتور..وقاله مين اللي جابك

أمك سألت في ايه..ابوك قالها ليه

ودخلوا في خناقة..أخوك اغمى عليه

البيت كله بيشرب..لمون وكركديه

منعوك من الأمتحان..عشان اللي انت فيه

هتعمل عمليه..بخمس آلاف جنيه

وشيلت خمس مواد..شيلت السنه ولا ايه؟

تأليف: أحمد محيسين