الغيرة
أول جريمة غيرة..قابيل قتل هابيل
قربان فرق مابينهم..أخوه الكبير بيغير
زين ليه الشيطان مكان..يجعل أخوه فيه قتيل
فَـاتحول المكان لحلبة..الدم فيها يسيل
فَـالدم يسري يجري..ما بين أخوات وشعوب
فتلاقي أخوك عدو..فَـليه تعيش مرعوب
مش عاجبك المثال..فَـشوف ولاد يعقوب
رموا يوسف في البير..وسارعوا في الهروب
فَـهربوا من جريمة..دول كانوا هيقتلوه
فَـيسيبوا يوسف لوحده..ويكسروا قلب أبوه
مش بس كرهوا يوسف..دول كرهوا كمان أخوه
علشان يزيدوا في مالهم..تخلوا عنه سابوه
ماهى الحقيقة ظاهرة..بس أنت باعد عنها
الغيرة ماشية بينا..ياترى مين دفنها؟
حابب تعيش في راحة..ابعد وسيب مكانها
حابب تعيش مكانك..ادفن أخوك وادفنها
لو ترضى يا ابن آدم..تعيش وحيد فعيش
سبب موت ابن آدم..غيرة مابتنتهيش
دا دم وماشي بينا..من يوم قابيل مارضيش
يسيب أخوه في حاله..لكن رفضله العيش
مش كل أخ حبيب.. فيه هارون وفيه قابيل
وفي اللي بث سمه..وفيه حاميك م الفيل
وفي اللي واقف جنبك..ومهدلك سبيل
وفيه اللي شاف طموحك..فقالك مستحيل
بتحب اخوك وكارهك..الغيرة ماشية في دمه
فَـمهما تحبه كارهك..نصيحتي ابعد عنه
مش كل أخ كاره..ولا كله السم في دمه
لكن لو اخوك قابيل..اوعاك تقرب منه
تأليف: أحمد محيسين
إرسال تعليق