العصاية

فرغم كل سبب

شوفت منهم ياما العجب

اَتضرِب علشان إتضرَب!!

نفسي أعرف ايه السبب؟

بنام متأخر.. أرق!!

محضرتش طابور العبط

مين فيكم رافض يتعبط؟

محدش فيكم نطق!!

غيابي قفل سنة

كل يوم بروح فَـاتمنع

فتح الباب لأي طالب

أظن كلامكوا اتسمع؟

فبلاش تكراره كتير

مش داخل مكتب وزير

انا جاي حباً في اللي فيها

مش جاي حباً في التعليم

تلاميذ بتاكل بعض

كل دا علشان نطقت:

"الوجبة جاية في طريقها"

في الآخر مكانها الأرض!!

المنهج قايم ع الضرب

فَـالتلاميذ ما بينهم حرب

كل فصل اتحول حلبة

الضعيف جزاته (الطرد)

علمتوهم الرباية

بس ازاي دا بالعصاية؟

هو الطفل أصبح ركوبة

مش فاهمين ايه الحكاية؟